قصيدة هشام الجخ { مكملين }

حنا نزلنا ليه

مكملين

للى مش فاهمين نزولنا ..

للى معاشوش ظلمنا ولا قهرنا وحسوش نزول

للى مداقوش مر جوعنا ..

اللى ماناموش فى الشوارع كالدبايح

كملوا في الليل عشاهم م الصفايح ..

.

للى مش فاهمين مهانة الرجال

قهر الرجال ..

للى بيقولوا علينا إننا حبة عيال ..

احنــا مش حبة عيال.

احنا شوفنا النيل بينشف فى البيوت

واما يجرى …

يتفرش حمام سباحة فى قصر باشا

مستكترين فيا الغضب ..

مانا كنت غرقان فى البشاشه

كنت راضى ببوق مايه واقول دى هانت

كنت ببكى فى القصايد ..

كنت بشتم فى القصايد..

تتقطع ايدى اما قولت حبيبتى ماتت

للى مش فهمين نزولنا فى الشوارع ..

احنا بندور على الحلم اللى ضايع ..

احنا جرينا النفق فى عروق عيالنــا

يكبروا فاهمين حاجات مافهمنهاش..

اقبل انى اعيش عشان حلم وقضيه

بس ما اقبلشي انى عمرى يضيع بلاش

مااحنا سيبنلكوا البلد مانصفتوهاش

ماتلوموش على اللى اتعجبن فى المعجنه واللى اتظلم

واذا كنتوا فاكرينا غنم .. على رزقكم أنا جدْي فاق

فاكرين زمان حذرتكم

مستنى ايه من طفل رَبُّوه بالزعاق

إذَا كنتوا فاكرينا غنم

على رزقكم أنا جِدْى فاق

أرزاق..

للى مش فاهمين نزولنا فى الشورع ..

الحكومة عودتنا على الشوارع

بيتتنا فى الشوارع

الحكومة نيمتنا فى الشوارع

سكرت على نفسها كل البيبان

خوفتنا من البيبان ..

فاترمينا كلنا فى حضن الشوارع

اكتر مكان لقيناه امان ..

إللى خايفين على البلد لحسن تموت

ماتخافووووش

الموت سكوت ..

واحنا مش فى الخطه اصلا ان بكرة يكون سكوت ..

احنا شايلين حملنا ومكملين ..

بكرة بيشاور علينا واحنا مش مستعجلين

مااحنا لينا كام سنه مدقندلين

صابحين فى طين .. نايمين فى طين

احنا بنأسس بلد تسمع شكاوى المظلومين

نشتغل نلقى عرقنا قصاد عينينا

مش فى جيب النصابين

نشتكى نلقى الودان

نلقى اللى يسمع شكوة الناس الغلابه الطيبين

احنا بنشكل بلد لاهى خايفة من صوت الاذان

ولا خايفة من ان الكنائس تتبنى

احنا نأسس وطن عافيان غنى

مش وطن يخدم 15 نفر ويبات جعان

احنا مش عاوزين وطن مهزوز مهان

المصرى مش لايقة عليه كلمة “مهان”

يقولك احنا عملنا فوضى

طب احنا بردوا عملنا فوضى !!

ده احنا كنا بنتجلد ونعيش ونرضى

واحنا كنا بنتسرق ونعيش ونرضى

كانت الاسعار بتغلى وكنت برضى

والشرطة بتفتشنى عااادى

فى اى وقت فى اى حته وبدون مناسبة

وكنت برضى

والانتخاب من سن كام لسن كام “معرفشى ليه”

وكنت برضى

جاى انهاردة تقولى احنا عملنا فوضى

طب فوضى فوضى

ماسورة الغاز بتقفلها لصعيد بلدك وتل ابيب بتفتحها

ماسورة الغاز بتقفلها على ولادك وللاعداء بتفتحها

وناس شقيانه طول الليل عشان لقمه ..

وغالى ياخدها على الجاهز .. اللهى يارب يطفحهــا

وناس تسكن قصور بتدور .. وناس الجوع بيدبحها

وناس بتموت فى الميادين فدى الثوره …

وناس خايفة على مشاعره لنجرحهاااا

احنا هانكمل وهانزق البيبان

يارب انت المستعان

واللى بيقولوا علينا مغيبين ومسطحين وبوابين ومعفنين ومنتنين وبلطجيه وماجورين

خليهم براحتهم .. احنا بردوا مؤدبين

ومسالمين

بس احنا بردوا “مكملين”

هشام الجخ | مكملين